Igstiega in Flueger und scho hemmer wider dPatricia und dSandra troffa. Sind den guat glandet in Baltra, das isch dr Flughafa vo dr schoena Insla. Haend den vo doet an Bus und a Faerry kno zum uf dInsla Santa Cruz zko und doet haend uess scho dia erschta Pelikana und Seeloewana begruesst. Hend den nomol an Bus kno und am Mittag simmer den entli in Puerto Ayora ako. Haend uess den gli uf dsuachi gmacht fuer as Hotel und sind schnell fuendig worda. Spoeter simmer uess go informiera was alles uf da Galapagos kasch unterne und haend den au grad as paar Toura buecht.
Am noechschta Tag hemmer scho dia erschti klieni Tour unterno. Dia erschta Blaufuesser gseh (Das isch an Vogel mit blauna Fuess), Seeloewena und super vieli Leguanas hend sich au zur schau gstellt. Go Schnorchla simmer den au no, aber zMeer isch recht stark gsi und somit isch dSicht nid grad so guat gsi. Sind den no in dLa Grieta, links und rechts riesigi Felsana und in dr mitti super klars Suesswasser. Doet haemmer nomol Gschnorchlet und den simmer wider zruck. Am nomittag simmer den no an Tortuga Bay, a wunderschoena Strand wos Leguanas ka het und an kliena Shark. Super heiss isches gsi und so haemmer den dr Tag usklinga lo mit no as biz suennela.
Am noechschta Tag isch dInsla Isabela agseit gsi und Sandra het sich am vor Obed a klieni Magaverstimmig verwuetscht. zBoot uf dInsla isch erscht am zwei los und somit simmer am Morga no Charls Darwin go aluaga. A Reseve mit riesa Schildkroet, unglaublichi Fotana hemmer gmacht.(muend no as biz warta bis dFotisession agseit isch:-)) . Dia arm Sandra het alles muessa mitmacha und as het scho oepa 30 Grad ka. Am zwei isches den los mit dem Boot und zweistd. spoeter simmer ako in Isla Isabela. Ab in a Bus und ins Hotel, den a Stund spoeter simmer a Laguna go aluaga wos keissa het doet gsehmer den dFlamingos. Hahaha an Witz genau eina hets ka und am noechschta Morga isch de immer no an dr glicha stell gsi. Hend gmeint de segi usgstopft.
Sind den mit da Pferda uf da Vulkan Sierra Negra. Miar hens an Emul geh das isch so a mischig vo Esel und Pferd. De arm het recht muessa schaffa und as het mega Spass gmacht. Am noechschta Pferderenna koemmer sicher mitmacha, denn dia Pferda sind anderscht los galopiert. As isch a sooooooooo luschtig gsi wia Hampelmaenner hemmer usgseh. Am Nomittag simmer den no go Sharks aluaga und Pinguina hemmer au no gseh und zSeeloewena koehrend immer dr zua. Nach em Spatziergang isch den no Schnorchla agseit gsi und den simmer zfrieda zruck ins Hotel. Am Tag druf haemmer an haenger igleid und haend dr ganzi Tag am Strand verbrocht. Natuerlich dia kuehla Biarli hend nid gfehlt bi 30 Grad :-) .
Am noechschta Tag haemmer frueh muessa ussa do dFaerry scho am Morga am 6i los isch. Sind den am 9i wider in Puerto Ayora gsi. dSandra het sich den grad uf da Weg gmacht zum no a Tagestour zbuacha. As het leider nur no fuer zwei Platz ka und so sind den miar am noechschta Tag uf dInsla Seymour. Do miar nur no ein Tag hend und dGirlis no zwei.
De Usflug isch dr Hammer gsi, fuer uess eina vo da beschta bis jetzt. Was miar alles gseh hend unglaublich wia imana Tierlibuach. Vo Frigatas (Au a Vogelart wo vorna am Hals an riessa rota Sack het woner ufblost wener sich moecht bemerkbar macha bi da Wibli), Mantarays, Galapagos Shark, Tussigi Fisch und zbeschta miar hend sogar mit Seeloewena koenna schwimma. dSchildkroet het au nid gfaellt und dr Leguan het au no hallo gseit. Das Schnorchla goht in dGschicht i fuer uess, no nia a so klars Wasser gseh wia an dem Tag. Sind so zfrieda und mued zruck nach Puerto Ayora. Am Obed hets no an Stromusfall geh fuer oepa 3std.
Am noechschta Tag isch zParadies zEnd ganga und miar sind wider zruck nach Quito. dGirlis sind no an Tag laenger bliba doch dia werdemer huet Obed nomol gseh und fuer uess heisst ab Morn Adios Sued America, Welcome Central America.
Costa Rica wir kommen!!!!!!!
