Ako in Cuzco und scho isch uess a Offerta uf da Tisch gleid worda fuer a 4taegi Wanderig uf da Machupicchu. Super hets toent und so hemmer den au am noechschta Tag zua gseit. Doch bevor es los ganga isch am noechschta Tag simmer no an Fuassballmatch go luaga. Cooli sach gsi doch dManschaft vo Uruguay het recht zkempfa ka waeg dr Hoechi. Hend sich aber tapfer gschlaga.
Amigos am noechschta Tag isches den los ganga mit dem Ziel Machupicchu, hend uess am 7 am Morga abgholt und den isches richtig Busterminal. Doet hemmer den dVelos uf da Bus verlada und den isches los ganga 5std. ride mit dem Bus und nocher 4std. Down Hill mit Velos imana Zuaschtand unglaublich. Am Schluss simmer zdritta gsi wo hend muessa uf Santa Maria laufa will dia super Velos usanand keit sind. Mini Prinzessin het sogar no an Sturz anagleid will so as A...... vo mana Busfahrer kei Platz gmacht het. Isch aber alles guat ganga und Daniela isch au ganz in Santa Maria ako.
Santa Maria isch uesseri erschti Uebernachtig gsi, ganz ok gsi zHostel und dr Food isch au guat gsi. Viel hemmer den nuem gmacht sind den gli amol go Pfusa.
Tagwach am 7i zMorgagessa und am halbi8i simmer den los gloffa. Am Afang dia erschta paar km isches grad us ganga und den isch an Ufstieg agseit gsi vo 2std. An rechta Ufstieg gsi, aber miar hend wider amol a super schwein ka was uesseri Gruppa abelangt und so isches gli au no a witziga Ufstieg gsi. Unterwex hemmer den dr erschti halt gmacht mitten drin im Jungel, hend doet uess verstaerkt und no so a Cacaomassa kauft fur dCocablaetter. Cocablaetter seitma helfi in dr Hochi und gebi Energie, aber vo dem hemmer nid viel gspuehrt aber zganza Mul isch amigs guat igschloffa. Sind nach oepa 9std. Wanderig ako in Santa Teresa, sind den in as Thermalbad uess as biz go erhola. Unterwex hesch koenna vo da Baeum Mango, Limona und Banana pfluecka. Ebafalls haemmer uess au no muessa mitara offena Seilbahn uebera Fluss zuecha, an eimoliga Tag gsi. Hend den in Santa Teresa zerschta Biar zu uess kno und am Obig simmer den alli zaemma in a Disco und Party het grockt nach 3liter Rum.
Am noechschta Tag isch den dr Guide zu uess ko und het dr Vorschlag brocht mit dem Bus witer zgo. Er het an rechta Hang Over ka, hetti glaub a Flaescha soella usloh:-)) Nuet isch zMorga gessa und den haemmer wider dr Rucksack uf da Rucka bunda und los isches ganga. Sind oepa 5std. unterwex gsi und den simmer scho in Agua Caliente ako. Unterwex hemmer scho koenna as paar Ruinana vom Machupicchu gseh und so isch dvorfreut immer groesser worda. In Agua Caliente isch es den in a super Hotel mit warm Wasser und Privatbadzimmer, dafuer zEssa isch nuet gsi. Sind den gli amol go schlofa, den am letschta Tag isch am 4i Tagwach gsi. Sind am halbi5i los richtig Machupicchu und wo miar doba ako sind oepa am 6i, haemmer sicher ueber 500 Staegatritt hinter uess ka. Super astrengend gsi und das am Morga ohni an zMorga im Maga. Wo miar den inna sind in da Machupicchu isch alles grau gsi vom Nebel und ma het nid viel gseh. Hend den a Tour in dia Ruinana gmacht und uess alles agluagt. Sind den zerscht no uf da Wayamapicchu uf uess kno und wo miar doba ako sind (wider nur stegatritt) het sich dr Nebel verabschiedet und a unglaublichi Ussicht hesch ka uf dRuinana. Hend den gli dr Abstieg uf uess kno und sind den dia magischa Moment vo dem Machupicchu go inna zuecha. WoW!!!! was fuer as Erlebnis, sind den au no zum Sunnatempel glofa und natuerlich au ueber Staegatritt. Haend uess dr Machupichu vo allna Sita agluagt und so haemmer oepa 7std in dem magischa Fleck verbrocht. Sind den wider dia viela Staegatritt aba und hend den dr Zug gno zruck nach Cuzco. In Cuzco simmer den no amana Obed alli zaemma go abfiera und den isch de super Tripp verbi gsi. No luschtig wen in Cuzco bisch und am Obed ussa gosch muasch kei Geld mit ne, den alles isch Gratis. Jeda will di mitneh in sini Bar und verspricht dr an Gratistrink (Cuba Libre) und so hemmer a klieni Bartour unterno und am Schluss bisch recht guat parrat gsi.
Sind den witer nach Lima...............
