Haend dae Bus gno und sind nach Florianopolis. Ich saeg eu dae Busfahrer isch so schnell gfahre, dass miaer froh gsi sind heil azcho in Florianopolis. In Florianopolis haemmer daenkt, chum miaer tuent nomal zeltae. Ui nei, es isch dae horror gsi (ich glaube miaer sind definitiv Campingmued). Haend ja keis Auto meh gah wo miaer alles haend choene innaetue und dementspraechend haemmer alles im Zelt gah, Ruecksaeck, Schueh, assae, etc. Patrik haet au sini 2 Thermomatratze kaputt gmacht und jede abig han muessae koehrae "ich schlaf ufem Bodae". 5 Tagae simmer in Florianopolis gsi, haend richtig d'waermi gnossae und sind jede Tag an Strand. Es isch schoen gsi aber zu viel Luet, miaer haend fascht kei Platz gfundae (au da isch Feriaeziit gsi). S' Wasser isch schoen warm gsi und haend choenae richtig badae. In Florianopolis haet oppae 4 verschiedeni Straend gah und natuerlich simmer au alli go aluegae.
Amenae Morgae isch wuescht Waetter gsi und so simmer in ae Cafi inaeghockt und haend doete ae Schwiezerpaerli troffae. Sie isch vo Brasiliae und er isch italiener aber beidi wohnet in Lugano. So haemmer daenn dae ganze Tag mit ihnae verbracht. Sind Duenenae vo Joaquina go alueage und doetae haend Boys ufem Sand g'surfet. Es isch luschtig gsi, aber es haet so g'windet, dass fuer eus Frauae z'chalt gsi isch. Nachdem sie fertig g'surfet haend, simmer an Strand gangae. Es isch mega schoen gsi und sind ae biz doetae bliebae. Aber da dae Sunnae noet immer gschunae haet simmer daenn au witer gangae. Haend gfundae, chum miaer goent dae 2 Strand go aluegae und sind Bahia Mole go aluegae. Wow, ae wunderschoenae Strand und Surfer sind alli dussae gsi. Miaer haend nur en Drink gno und haend dae Luet zuegluet. Es isch eifach schad gsi, dass s'Waetter noed so mitgmacht haet, trotzdem haemmer dae Tag gnossae.
Am noechschtae Tag simmer dae 3 und letschtae Strand go aluegae. Da dae echli witer ae weg gsi isch haemmer dae Bus muessae neh. Oh, miaer haend meh als ae Stund muessae warte, bis dae Bus cho isch (welcome in South America). Sind oppae in Playa Ingles am 11 acho und da d'Sunnae so braennt haet, haemmer en Strandschirm gmietet, so dass miaer echli Schattae gah haend i dae warmae Stundae. Haend dae ganzae Tag g'suennelet und badet. Es haet richtig guet da. Am Abig isch natuerlich dasselbe gsi. Miaer haend meh als 2 Stundae gah und am 9.30 simmer vorem Campingplatz gsi. Haend schnell oeppis gaessae, duschet und sind daenn go schlafae.
Nach Florianopolis simmer nach....
Foz do Igazu
In Foz do Igazu simmer am 9.00 am Morgae acho und miaer haend scho 29 grad gah. Was fuer ae waermi. Sind ins Hotel und schnaell haemmer eus ueber d'Wasserfall informiert. Ich ha unbedingt mit dem Boot woellae gah und somit haemmer au 2 Platzli gfundae und sofort buecht. A dem Tag, simmer d'Wasserfall vo dae brasilianischae Sitae go aluegae. Es isch schoen gsi, aber nie so gross und so schoen wiae diae vo dae argentinischae Sitae. Haend d'Wasserfall unter 43 grad agluegt. Das isch Brasiliae!!!!
Am noechschtae Tag simmer uf dae argentinischae Sitae gangae. Haend muessae 2 Bues neh und natuerlich au durch dae Zoll durae. A dem Tag isch es ich noed viel chaelter gsi, 39 grad. :-) Wow, sind so verbluefft gsi, bsunders wo miaer mit dem Boot so noech bi dae Faell gsi sind. Miaer sind pflotschnass gsi, doch das haet eus nuet usgmacht es isch ae gueti erfrischig gsi. Und nachdem miaer "El Diablo" gseh haend, simmer ohni Wort doet gstandae und haend gspuerht diae Energie und Wucht vo dem Wasserfall.
Wow, ein MUSS, waenn in Brasiliae oder Argentiniae bisch. Haend daenn am noechschtae Tag dae Bus gno nach Buenos Aires.
